Khawvela pa hausa ber Bernard Arnault chu

French luxury goods giant LVMH chairman Bernard Arnault chuan Twitter hotupa Elon Musk nekchhuakin khawvela hausa ber nihna a rawn chelh ve leh ta. Bloomberg-in khawvela mi hausa tawntaw list thar ber a tihchhuahah Arnault hi a rawn chungnung ber a, European zinga pa hausa ber dinhmun chelh thei hmasa ber a ni.

USD tld 171 hu zet neitu, Arnault chuan USD tld 164 hu neitu Elon Musk chu Thawhlehni khan a nekchhuak tih Bloomberg Billionaires Index chuan a tarlang.

Arnault hian kum 1989 aṭangin LVMH stake tam zawk hi a enkawl ṭan a, chumi hnuah khawvel huap brand ṭha eltiang, Louis Vuitton leh Moët Hennessy thuneitu a ni nghal.

Mi nawlpuiin a hming hi hre lar lo mah ila, Christian Dior aṭanga Dom Pérignon ṭhanlenna kawnga a meizang hlaptu mi pawimawh a ni.

Kum 30 liam ta chhung khan Arnault chuan LVMH hi luxury goods powerhouse-ah a chantir thei a, label 75 chuang neiin, wine, spirits, fashion, leather goods, perfumes, cosmetics, watches, jewelery, luxury travel leh hotel stays thlengin sumdawnna an kalpui a ni.

January 2021 khan, US jeweler Tiffany & Co chu USD tld 15.8 zetin an leichhawnsak. Arnault hian a company LVMH kaltlangin mipui tan a luangchhuak nasa ṭhin hle. Kum 2019-a Notre Dame a kan ṭum khan, sakhaw hmun hmingthang siamṭhat nan USD mtd 212 an lo thawh tawh a ni.

Arnault hian hun rei tak chhung Europe-a hausa ber nihna lo chelh tawh mah se, kum 73 mi hi mi dang ang lo takin a intheh lar ve lem lo a, social media khawvelah phei chuan hmuh tur a vang hle. Arnault hi Helene Mercier nen inneiin fa panga an nei mek a, an fate hi LVMH leh an brand eng nge maw berah an thawk mek tih Bloomberg chuan a tarlang.