Science & Environment; NASA-in kan chenna leichhunga tui awmte zirchianna kalpui

American space agency NASA chuan December 15 khan California chhim lam aṭangin kan chenna leilunga tui inchheprel, surface water resource ṭha zawka zirchianna tur international satellite mission chu a kapchhuak tih agency chuan a tarlang.

NASA sawi danin, he mission hi Surface Water and Ocean Topography (SWOT) tih hmingchawia kalpui a ni. Kan chennaa lui luang te, dil leh tuipui-te dinhmun tunlai khawl changkang "three-dimensional view" hmangin zirchianna a nei dawn a ni. "SWOT hian khawvela lui luan dan chiang zawkin min hriattir thei dawn a, tuipuite'n sik leh sa inthlak zelah danglamna a thlen dante leh, khawkheng leh tui lian hmachhawn dan ṭha zawk min hriattir thei ang," tiin space agency chuan a sawi.

SWOT hian researcher-te chu tui che reng leh danglam reng te len lam a hriattir thei dawn a, tui thianghlim engzata tam nge la awm tih leh, tuilian leh sik leh sa inthlak dan chenin min pui thei dawn a ni, an ti.

He mission nei tur hian kum 20 dawn buaipui a lo ni tawh a, scientist-te chuan cutting-edge microwave radar technology hmangin khawvela tuipui 90% chuang chik zawkin an enfiah thei dawn a ni. He satellite hi NASA-a Jet Propulsion Laboratory-te design leh siam a ni. SWOT hi NASA leh France-a Centre National d'Etudes Spatiales ṭangkawpin an siam a ni a, Canadian Space Agency leh UK Space Agency te'n tha an thawh bawk a ni.