Zaninah CLASSIC ROCK FEST '22

Facebook-a group pakhat 'Classic Rock Ngainatute' huaihawt, kum 2015 aṭanga kum tin (covid vangin 2020 leh '21-ah neih a ni lo) neih ṭhin, Classic Rock Fest '22 chu zanin (December ni 19) hian Vanapa Hall-ah neih a ni leh dawn ta!

Mizo band ṭha tak tak ten tunhma Rock music ṭha leh nalh an dinchhuahpui leh dawn a, rock music tuipuitute tan chhim a manhla leh hle ang. LPS leh Zonet Cable bakah Youtube lamah live telecast a ni bawk ang.

An lo tih ṭhin tawh angin hall luh man a awm dawn lo a, mahse Aizawl Civil Hospital-a damlo harsa zawkte tan 'Chanhaite Pual' bawm erawh dawh a ni dawn. Hei bakah hian, a hmunah ei leh in lei tur a awm bawk ang. Chhungkua pawha kalna tlak khawpa thianghlim leh felfai CR Fest-ah hian hun rawn hmang ve turin a buatsaihtute chuan mi tin an sawm a ni.