Pokemon-ah Ash Ketchum leh Pikachu tel tawh dawn lo!

Pokemon anime series-a a changtupa Ash Ketchum leh a hnungzuitu rinawm Pikachu-te chuan kum 25 chhung zet an lo inlan tawhna chu an mangṭha dawn ta. Pokemon siamtute chuan Zirtawpni liam ta khan, April 2023 aṭang chuan hmel thar kan hmuh tawh tur thu an tarlang.

He Japanese anime show hi movie thlenga tihchhuah a lo ni tawh. Kum 1997 aṭang khan Ash hi kum 10 mi ni chungin Pokemon master trainer ni turin bul a ṭan a, Pikachu nen intawng chhoin naupang tam takte tan hmuhnawm leh mite atchilh rawn an ni chho a ni.

Thla hmasa khan, Ash chuan a tum ber tihlawhtlingin Pokemon World Championship-ah hnehna a chang thei ta a ni. Nakkum nipui aṭang chuan a changtu thar pahnih kan hmu tawh dawn a, hmeichhe naupang Liko leh mipa naupang Roy bakah Paldea starter Pokemon pathum, Sprigatito, Fuecoco leh Quaxly-te hmuh tur an awm bawk ang.

"Mite'n Pokemon an ngainatna chhan heng - action, adventure, inṭhianṭhatna leh Pokemon hmuhnawm tak tak kha lantir a ni ang," tiin producer-te chuan an sawi.

Hemi hma, January 13 hian, episode 11 awmna epilogue series, "Pokémon Journeys in the West"-ah Ash leh Pikachu-te zinkawng leh thawnthu tawp ber tarlan a ni dawn a, India rama tihchhuah hun tur hi chiang taka tarlan a la awm lo a ni.