Billboard Album 200 Chart Ropuina ramah U2 an cheng zel

Irish rock band U2 chuan Billboard Album 200 Chart-ah a zawnin pakhatna an hauh a, ropuina ramah an cheng mek.

U2 hian December 1 khan an album thar 'Songs of Experience' chu an tlangzarh a, chart-ah pakhatna a nihpui nghal chat. Tun ṭumah pawh dinhmun sang ber an hauh leh a, an album tih chhuah tawh 16 zinga pariat zet chuan pakhatna hi an hauh ta a ni. U2 hian kum 1987 daih tawh khan a vawi khat nan chart-ah hian a ber nihna hi an lo hauh tawh a, ṭhangkhat lian zet hnuah pawh an ropuina la chuai chuang lo. Kum 1976-a din Irish band-te record duhawm tak hi sawinep chi a ni lo a, Adult Alternative Songs Chart-a pakhatna hauh thei album 13 zet nei thei an nihna pawh hi sawi hmaih chi a ni lo ang.

An album thar Songs of Experience hi kar liam ta chhung khan US-ah ringawt copy nuai khat chuang hralh chhuah leh a ni a, Chris Stapleton album From A Room : Volume 2 chu hralh tam lamah pahnihna a ni. Chris Stapleton hian a dinhmun ngai a luah a, pathumna chu Taylor Swift a ni. Top 3 te an awmna ngaiah an awm a, Pentatonix chuan hma rawn sawn hretin palina an ni. Kum 2016-a an tichhuah 'A Pentatonix Christmas' album chu hralh a la kal rih viau a, hei bakah hian kum 2014-a an tihchhuah 'That's Christmas To Me' chu album hralh tam lamah pariatna a la ni cheu bawk. Krismas boruakin mitin a chiah hnenh avangin Pentatonix-in chart 10-a lang thei album pahnih an nei hi thil mak a ni hran lo.

Demi Lovato album 'Tell Me You Love Me' pawh hralh a la kal viau zel a, Garth Brooks, Sam Smith, Ed Sheeran leh Michael Buble te pawhin album hralhna aṭangin sum an la hailut hnem fu bawk.

1. Songs Of Experience - U2
2. From A Room : Volume 2 - Chris Stapleton
3. Reputation - Taylor Swift
4. A Pentatonix Christmas - Pentatonix
5. Tell Me You Love Me - Demi Lovato
6. The Anthology: Part I, The First Five Years - Garth Brooks
7. The Thrill Of It All - Sam Smith
8. That's Christmas To Me - Pentatonix
9. Divide - Ed Sheeran
10. Christmas - Michael Buble