Delhi aiin Mumbai khawpui boruak a bawlhlawh zawk

Delhi khawpui boruak bawlhlawh zia kan sawi chamchi a, mahse tunah chuan Mumbai khawpui boruak a blawhlawh zawk an ti leh tawh.

Delhi khawpui Air quality index chu 204 a nih laiin, Mumbai Air quality index chu 244 lai a ni. Kumin chhunga boruak bawlhlawh dan tehna hrang hrangah Delhi leh Mumbai hi a inthlau lo viau a, Mumbai hian ṭum hnih zet chu a khum tawh nge nghe. October thla kha boruak bawlhhlawh lai ber chu a ni a, hetih hun lai hian AQI chu 316 a tling a, March thla khan AQI hi 312 lai a ni bawk. Tun hnai khan Mumbai-ah hian air pollution a nasa thar leh a, mihring hriselna atan pawh a hlauhawm pha niin mithiamte chuan an sawi.

System of Air Quality Weather Forecasting and Research (SAFAR) chuan India rama khawpui hrang hranga boruak bawlhlawh dan a tehnaah hian heng khawpui pahnihte bakah hian, Pune leh Ahmedabad te chu a sang zual an ni. AQI-ah hian 0-50 chu a ṭha ber niin, 51-100 chuan a dawt a, 101-200 inkar chu a vantlang a ni. 201-300 chu boruak chhiaah ngaih a ni a, 301-400 chu mihring hriselna atan pawh pawi niin, 400 chunglam chu thihpui theih hial a ni.