FIFA World Cup Final-in ngaihven a hlawh, record thar a siam

Alphabet leh Google hotu Sundar Pichai chuan Google din tirh aṭangin FIFA World Cup final zan khan kum 25 hnua Google search logged buai ber ṭum a nih thu a sawi.

Argentina leh France chu hun pekbelh thleng 3-3 a an inhneh tawk hnuah penalty hmanga chak zawk zawnnaah Argentina chuan 4-2 a hnehna changin nomawi hi an chawi a, World Cup game hmuhnawm leh theihnghilh theih tawh loh tur min entir a ni.

"Chhinchhiah theih chinah kum 25 chhung google traffic buai ber ṭum a ni. Mi zawng zawng khan #FIFAWorldCup chauh an ngaihven amaw tih mai tur a ni," tiin Pichai chuan Twitter-ah a sawi.

Hei bakah, thla hmasaa Google-in "Year In Search 2022" report thar ber a tihchhuahah FIFA World Cup chu India rama zawn hlawh pathumna a hauh phak a ni.

India aiawhin SRK, Deepika leh Nora Fatehi

World Cup final en tura Bollywood celeb inlan zingah Shah Rukh Khan pawh a tel ve a, inkhel en tur mai ni loin a film thar ber "Pathaan" tilar tura zin a ni. "Pathaan"-a SRK-a chanpui Deepika Padukone chuan final zan khan Spain football legend Iker Casillas nen WC nomawi hi an khuhhawng. Nora Fatehi chuan WC Final zan khan Balqees, Rahma Riad leh Manal-te nen 'Light the Sky' performance hmuhnawm tak min hlui a, mit leh beng a tlai lehpekin, fak pawh a hlawh phah nghe nghe hle.

Milarte'n World Champion Argentina lawmpuina hlan

Khawvela huapa rimawi lama mi hmingthang rualte'n World Cup champion Argentina lawmpuina thu an hlan.

Lawmpuina hlantu mi langsar zingah, Marshmello, Ricky Martin, Kid Cudi, Daddy Yankee, Niall Horan bakah artist ṭhahnem takin Pathianni zana Lusail Stadium-a ennawm ropui min hluitu leh, chakna changtu Argentina an lawmpui zia an tarlang nasa hle.

"Messi Messi Messi," -Marshmello

"Football game hmuhnawm bik a va ni em!! Congratulations Argentina," - Nial Horan (ex-One Direction)