Khiangte Construction Ṭhazual Lengzem Manuna'n chart chung ber a luah

Khiangte Construction Ṭhazual Lengzem chart thar berah Manuna'n ama hla phuah, 'I hmel a ṭha' hmangin pakhatna dinhmun a rawn luah.

Chart lama hmasawn chak tak Manuna hian October thla khan Music Video-a tichhuak a, a hla a mawi piah lamah an chevel a hmuhnawn bawk nen chart-ah pawh hniam lam a pan thei lo mai ni loin, tunah chuan pakhatna hian a rawn ni thei ta a ni. MV mawi tak siamtu hi BS Pictures a ni a, recording leh guitar buaipuitu hi Hope Music an ni. Tune hi JT Production siam niin, music hi Rpa Ralte kuthnu a ni thung. MV hlawhtlinna phena mite hian fak an phu ṭhin hle.

Siampuii & Casper, Jt Production ft Rachel Lalnunkimi an rawn lang
Ṭhazual Award Best New Artist pawh lo ni tawh, Siampuii Ralte leh artist hmasawn chak tak Casper-te thawhdunna 'Suangtuahna' chu pahnihnaah a rawn lang a, zaithiam leh hla phuah thiam bik tlemte zinga mi, Jt Production leh, Mizo Idol aṭanga kan hriat lar Rachel Lalnunkimi-te hla, 'Thawnthu a tawp' chu top 3-ah hian a rawn inhlangkai bawk a ni.

Chart a hla lang dangte
Sangpuii Hlondo leh David Zawma 'Ka phal silo' chu palinaah a rawn lang a, Tetea Renthlei hla thar, 'Bam leh raw sek sek' chu top 5 huangah a rawn invawrh chho der bawk. Mais Bee & El K, Mary Dawngi, Remruatfeli, Ivyz leh David Darlong-te chu chart-a hla lang dangte an ni.

Ṭhazual Lengzem Top 10
1. Manuna - I hmel a ṭha
2. Siampuii & Casper - Suangtuahna
3. Jt Production ft Rachel Lalnunkimi - Thawnthu a tawp
4. Sangpuii Hlondo & David Zawma - Ka phal silo
5. Tetea Renthlei - Bam leh raw sek sek
6. Mais Bee & El K - Piangvanneia
7. Mary Dawngi - Sakhmelmawi
8. Remruatfeli - A chhai min ti ang
9. Ivyz - Han ni la
10. David Darlong - Lenghermawi