Box Office-a roreltu Star Wars

'Star Wars: The Last Jedi' chuan kar liam ta chhung khan $mtd 220 zet lalutin, Box Office-ah ro a rel chiang hle. Star Wars hi tlangzarh aṭanga kar khat chhunga sum lakluh tam lamah pahnihna a rawn ni nghal bawk.

Science fiction film 'Star Wars: The Last Jedi' hi December 13 khan tlangzarh niin, U.S leh Canada-a theater 4,232-ah chuah a ni tawh a, sum a lalut hnem rem rem hle. Tlangzarh aṭanga kar khat chhunga sum lakluh tam lamah tluk loh pakhat chiah a nei a, chu chu 'Star Wars: The Force Awakens' kha a ni. Kum 2015 khan The Force Awakens hi tlangzarh a ni a, kar khat lek chhungin $mtd 248.8 zet a la lut a, sum lalut hnem ber record a ni. Record ding lai hi The Last Jedi hian a rawn hniah viau a, The Avengers ($mtd 207.4) leh Jurassic World ($mtd 208.8) te chu tlangzarh karkhat chhunga sum lalut tam zingah hian an tel bawk.

Box Office-a sum lalut tam pahnihna chu Ferdinand niin, a sumlakluh zat hi $mtd 13.3 a ni. Pakhatna leh pahnihna sum lakluh zat hi a inthlau rem rem hle. Hun eng emaw chen pakhatna lo ni tawh Coco chuan $mtd 10 lalutin, pathumnaah a tla thla. Wonder pawh sum lalut tam zingah a la tel zui zel a, kar liam ta chhung khan ticket hralhna aṭangin $mtd 5.4 lai a la lalut leh a ni. Justice League pawh sum lalut tam zingah a lang leh a, ṭum dang ang bawkin Daddy's Home 2, Thor: Ragnarok leh Lady Bird te chu an lang ve leh bawk.

Sum hailut hnem ber 'Star Wars: The Last Jedi' sumlak luh tawh zawng zawng hi $mtd 450 zet a tling tawh a ni.

Box Office Top 10
1. Star Wars : The Last Jedi - $mtd 220
2. Ferdinand - $mtd 13.3
3. Coco - $mtd 10
4. Wonder - $mtd 5.4
5. Justice League - $mtd 4.2
6. Daddy's Home 2 - $mtd 3.8
7. Thor: Ragnarok - $mtd 3
8. The Disaster Artist - $mtd 2.6
9. Murder on the Orient Express - $mtd 2.5
10. Lady Bird - $mtd 2.1