'Laltheri' film siam mek
Mizo-te'n film industry lamah hma kan sawn mek zel a, film siamtute kut chhuak pawh hmuh a nuam sawt viau. Heting a nih mek lai hian Mizo zinga film siam lama sulsutute zinga mi C. Hmingthangvunga chuan 'Laltheri' film a siam mek.
Laltheri hi Aizawl Lal, Lalsavunga fanu niin, a chanchin hi love story leh tragedy inkawp hmangin film-ah siam mek a ni. He film hi Mizo history behchhana siam a ni a, en chakawm leh ṭangkai thei tur tak a ni. Film siam hna hi kumin September aṭang khan ṭan a ni a, shooting pawh neih chhoh mek zel a ni. Beisei anga a kaltluan chuan nakkum April thla khian tlangzarh hman beisei a ni.
Film-a chang turte pawh hi uluk taka thlan an ni a, MFDS artistes skill training chhuak te leh, National School of Drama chhuakte an ni nawk. Anni bakah hian Dr. Louis Hauhnar pawh inlan tur zingah a tel a, a changtute hi mi 100 vel zet an ni. Costume designing pawh uluk taka tih a ni a, hmarua pawh Mizo history tarlang thei tur dap khawm a ni. Action film a nih ang ngeiin chempui, pasaltha chem, mi lulak chem, fei leh phawte pawh hmuh tur a awm dawn.
Shooting hi Falkawn-a Zokhuaah neih a ni a, a hmun leh hma pawh chei danglam nual a ni. Shooting hi zaa 80 vel zawh a ni tawh a, english sub-title a awm dawn bawk.