January-ah Indian Film Festival Mizoram Biate khaw pual film insiamsiak
January 23-25 chhung hian Indian Film Festival (IFF) Mizoram neih a ni dawn. Hemi pual hian Mizorama khaw fai ber Biate chungchang short film insiamsiakna buatsaih a ni.
Mizoram sorkar leh Innovations India ṭangkawpin an buatsaih tur IFF Mizoram chhung hian Biate chu Asia rama khawpui tê (small town) zinga fai ber a nihzia pholan tum a ni a, hei hi a zau thei ang bera puanzar tur a ni.
Film insiamsiak hi minute thum aia rei lo tur a ni a, Indian tawh phawt chu he intihsiakah hian a tel theih. Lawmmanah Rs 1,00,000/- sem ral a ni dawn a, pakhatnain Rs. 50,000/- a dang ang a, pahnihnain Rs. 30,000/- dawngin pathumnain Rs. 20,000/- a dawng ang a, an zavai hian merit certificate an dawng vek bawk ang.
Biate faina pho chhuahna pual short film hi English-a siam tur a ni a, Mizo-a siam a nih chuan a hnuaiah Englishin ziah (sub title) tur a ni. Hei hi a zau thei ang berin state dang leh ram dang hriata puanzar a ni ang.
January 15 hmaa thehluh tur a ni a, professional film maker-te bakah mimalin a mobile phone hmang pawhin short film hi a siam thei a, a zavai hian pawm vek a ni. Hre chiang dun tan he mi link - http://innovationsindia.org/bi... - ah hian en theih a ni.