Mission cashless travel Abhitej Boda-a'n Mizoram a chhuahsan

Hyderabad tlangval Abhitej Boda chuan kumin March thla aṭang khan Mission cashless travel a kalpui a, pawisa pai miah loin India ram fan chhuah a tum. Boda hian hmun hrang hrang a fankual hnuah Mizram pawh a lo chuangkai a, Aizawl a lo thlen hma hian ni 262 chhung zet hun a hmang hman.

Kum 23 mi Hyderabad tlangval hian March 22 khan India ram fang chhuak tur hian ke a pen chhuak ṭan a, pawisa engmah a pai lo a, smart phone pawh a keng hek lo. State 14 tlawhkual nan ni 262 a hmang a, tichuan Mizoram a rawn thleng ve ta a ni.

Abhitej Boda hi kawng sirah dingin lirthei remchang a piangah a chuang mai ṭhin. Mizoram a rawn thlen hnu pawh hian lirthei remchangah a chuang kual mai a ni. A cham chhung khan Aizawl aṭangin Thenzawl leh Lunglei te a tlawh bawk a, a kalnaah hian mi 50 chuang a kawmkual hman a ni. December 15 khan Mizoram chhuansanin Tripura a pan leh a ni. Mizote a hmuh dan

Abhitej Boda chuan Mizoram chu state dang aiin a danglam tih a sawi a, "Mizote hmelah thlamuanna a awm a ni" a ti. Eng nge Mizorama i lo zin a i beisei tih zawhna chu ,"Engthil mah ka beisei lo a, mahse thil engkim ka hmuin ka hre si a ni" tiin a chang. A kal tawhnaah hnam hlang anga cheng ho tam ber nia a hmuh thu a sawi bawk.

Abhitej Boda hian nakkum August thla khian pawisa, smart phone leh camera tel loa India ram fan chhuah a tum hi zawh hman a inbeisei. A kalnaah hian pawisa pek an tum pawhin a la duh ngai lo a, a zin chhan pawh a nih loh thu a sawi ṭhin.