Mite nghahhlelh 'Avatar 2' a hlawhtling; USD tld 2 a lalut tling thei dawn em?
James Cameron film siam, science-fiction epic film 'Avatar: The Way of Water' chu December 16 khan India rama theatres ah chhuah ṭan a ni a, tlangzarh kara film sum hailut hnem ber ni pha lo mah se a hlawhtlinna hi sawi nep theih erawh a ni lo. He film produce nan USD mtd 350 chuang zet an seng a, Pandora tihlar, 'market; nan hei aia tam fe hi an seng bawk.
USD tld 2 huangah a inhlangkai thei dawn em?
Film tlangzarh tawhah, kum 2009-a tihchhuah "Avatar" (USD tld 2.9), “Avengers: Endgame” (USD tld 2.7), “Titanic” (USD tld 2.1), “Star Wars: The Force Awakens” (USD tld 2.07) leh “Avengers: Infinity War” (USD tld 2.05)-te hi USD tld 2 chuang lalut thei an ni a, hriat tel atana ṭha chu hengte hi boruak ṭhat lai leh hripui len hmaa tlangzarhte an ni. Hripui len hnuah erawh thil a danglam tawh a, theatre aṭanga sum lakluh hian a hma a phak thei tawh loh avangin “The Way of Water” hi USD tld 2 lalut thei parukna ni thei tur chuan kawng thui tak a la mamawh a ni.
Kum 2019 khan Disney chuan 20th Century Fox chu an lei a, tunah chuan "Avatar" rights zawng zawng hi an kutah a awm tawh a ni.
Sum hailuh tawh zat
“Avatar: The Way of Water” hian kar liam ta chhung khan, North America theatre-ah USD mtd 134 chuang a hailut a, khawvel huapah USD mtd 435 a lalut tawh bawk. Covid-19 hri len hnuah global opening weekend-a sum lakluh tam lamah pathumna dinhmun a hauh mek a, “Doctor Strange in the Multiverse of Madness” (USD mtd 442 million) leh “Spider-Man: No Way Home” (USD mtd 600)-te hnungah a awm. Debut hlawhtling tak an nei na chungin “No Way Home” erawh USD tld 2 huangah a inhlangkai zo lo a, Covid hunlaia film hlawhtling “Top Gun: Maverick” leh “Jurassic World Dominion,” chu USD tld 1 vel bawr chauh an hailut thei.
James Cameron'an a beisei sang lutuk em
'Avatar 2' film khawrpum tur hian James Cameron chuan kum 13 chhung zet a bei. Mahse senior comscore analyst Paul Dergarabedian chuan, “James Cameron hi a inbeisei sang mah mah a ni," tiin, Hollywood chu Marvel film anga hlawhtlinna te chu mipuiin ngaiah kan nei tawh a ni, a ti a, tlangzarh kara USD mtd 180-200 inkar lalut ṭhin superhero adventure angin huhang a ngah tawk loh thu a sawi. Mahse, Cameron-a kutchhuak ngaihhlut bik, “Avatar” leh “Titanic"-te pawh kha box office-ah an che ropui nghal mai bik loa, Avatar phei kha chuan kum 10 liam ta khan tlangzarh karah USD mtd 77 chauh a lalut. Kum 1997-a tihchhuah 'Titanic' pawh kha tlangzarh karah chuan a che ropui tehchiam bik lo. USD mtd 28 chiah a lalut bawk. Hun a liam zel a, 3D ticket man sang zel leh, theatre-a vawi enge maw zat an chhuah nawn hnuah khawvela film hlawhtling leh sum lalut hnem an ni phak tawh a ni.
Hunpui laiin a che 'hit' thei
Kum tawpah film tlangzarh lian tham a awm tawh dawn loh avangin 'Avatar 2' hi hunpui laia film en nasat ber anih chhoh a rinawm a, khawthlang leh Mizoram thlenga mipuiin intihthawvenna kan zawm lai anih avangin entu hi chu an pun chhoh zel a beisei awm bawk a ni. Analyst-te chuan tunkar chhungin sum tam tak a hailuh belh an ring a, Imax leh 3D ticket-te'n kawng thui tak an sialsak thei bawk dawn a ni.