Twitter CEO hna chelh zo ka hmuh hunah, ka bang ang : Elon Musk

Twitter CEO hna thla hnih vel chauh a la chelh tihah, Elon Musk chuan chief executive hna chelh thei tura tling zo a hmuh veleh a nihna chu midang a ken nghal tur thu a sawi.

"He hna chelh duh khawpa mi mawl (foolish) ka hmuh hunah, ka bang ang! Chumi hnuah, software leh server team enkawl hna ka thawk vel mai mai ang," tiin Musk chuan Thawhlehni khan a sawi.

Company thuneitu ber nihna hi lo bansan pawh ni se, Musk chuan USD tld 44 zeta a lei, Twitter-ah thuneihna pumhlum a la chang dawn tho. Hei bakah, Musk hian a hmain Twitter CEO nghet lak a tum thu a lo sawi tawh bawk.

Pathianni khan, Musk chuan Twitter poll siamin, "Twitter hotu ka nihna aṭangin ka inhnukdawk dawn em?" tiha zawhna siamin, result a zirin thutlukna a siam tur thu a sawi lang. Darkar 12 voting period a hawn hnuah, Musk hi Twitter CEO aṭanga inhnukdawk tura duhtu hi an tam zawk a, 57.5%-in bang turin an duh a ni.

Musk hi Tesla leh rocket company, SpaceX CEO a la ni chhunzawm mek. Tesla holdings hlutna a tlakhniam vangin khawvela hausa ber ni ṭhin kha pahnihnaah a tlakniam phah. LVMH Moët Hennessy Louis Vuitton CEO, luxury-brand mogul Bernard Arnault chuan khawvel pa hausa ber nihna rawn chelhin, European zinga khawvel pa hausa ber ni thei pakhatna a ni nghal bawk a ni.