Kawtthlerah Coffee Nite buatsaih a ni leh dawn ta

Hrileng avanga kum hnih chhung Kawtthlera neih tawh loh, Coffee Nite chu mipuite chhim theihin Urlawk zan, December 24 zan dar 9 aṭang hian Temple Square ah neih a ni leh dawn ta.

Coffee Nite 2022-ah hian Dy.Chief Minister Tawnluia chu Father of The Nite a ni dawn a, Mafeli Hlondo in a host ang. Zathiam zai tur tihchian tawh zingah Jerry Lalrinawma, David Darlong, Hmangaihi, Sawmtea, Melody G Fanai, Faktu, Siampuii, Zorema Khiangte, Rinhlui, Grace, Jaui, Zothani, Zaii-te bakah backing vocals ṭha em em pahnih Aengi & Rosalyn te pawh anmahni pual hla neiin an inlan ang. Houseband ah ToCoda te an awm dawn.

Mizo Dance Camp te che vel hmuh tur a awm dawn a, Rock Music lam ngaina tan tunlai Rock Band ṭha Mood Station-te'n Krismas an urlawk dan tur hi hriat chakawm a ni dawn. Sound lampang a ngaihtuahawm dawn lo. Sound System nei ṭha chungchuang, Coffee Nite bul ṭantu zinga mi, International Standard chhawpchhuak theitu DELTA Sound an awm leh dawn bawk.

Cofffe Nite 2022 Main Sponsore hi Kuriz Shopping Mall niin anni bakah hian Willow Enterprise, New U, Westside, Me & Moms, Keeway & Benelli, UD & PA, Thara Store, Hindustan Coca Cola Ltd, Gini & Jony, Thangruma & Sons Store, LM Store, Lakme leh AB Marketing ten an Sponsored dawn a, zaithiam ten Julies Maniera kutchhuak an inbel dawn bawk.

Coffee Nite hi Salvation Army Youth, Aizawl Temple Corps-te buatsaih a ni a, Organising Committee chuan kum hnih chhung zet hripui leng a vanga mipui chhim theih loh a inchhung lama buatsaih a nih hnuah Pathian zara Kawtthlera buatsaih a ni leh tur hi lawmawm a ti a, Lal Isua Krista piancham hmuaka Coffee Nite-ah hian lo tel a, a hmuna chhim turin mizo mipui te an sawm.

Coffee Nite hi a hmuna chhim duh tan Temple Square pan mai tur a ni a, DDK, Zonet leh LPS ten Live in an pe chhuak dawn bawk. Coffee Nite aṭang sum hmuhchhuah zawng zawng hi ṭanpui ngaite hnenah semchhuah leh a ni ang.