Hipgnosis-in USD mtd 200 chuangin Bieber-a music catalog leisak tum

Hipgnosis Songs Capital chuan Justin Bieber-a hla te leh publishing catalog chu USD mtd 200 chuanga leisak tumin inbiakna thui tak an kalpui tawh niin Wall Street Journal chuan a tarlang. Inremna an siam thei a nih chuan Bieber-a hla hit tak tak, "Baby" aṭanga "Love Yourself" leh hla eng emaw zat chu an leisak dawn a ni.

Hipgnosis dintu leh chief executive ni bawk, Merck Mercuriadis chuan USD mtd 500 chuang inremna neih tumin inbiakna an kalpui mek thu sawiin, eng chungchangah nge an inbiak tarlan ni lo mah se Bieber-a rimawi te chu he inremnaah hian telh an nih thu a sawi.

Rimawi lama mi hmingthangte'n an music catalog hi an lo hralh fo ṭhin. Justin Timberlake chuan Hipgnosis hnenah USD mtd 100 in a lo hralh tawh a, Sting chuan UMPG hnenah USD mtd 360 velin a lo hralh tawh a, Genesis chuan Concord nen USD mtd 350 velin inremna an lo siam tawh a, David Bowie chuan Warner Chappell hnenah USD mtd 250-in a lo hralh tawh bawk.

Kum 10 leh a aia rei lo, Bieber-a music catalog ang te hi hla chuai thei lo, classic hits-te aia investment hlauhthawnawm zawkah ngaih a nih bakah, sum pawh an hailut tlem zawk ṭhin.

Mahse, Hipgnosis chuan hla upa lo lei nan an sum tam zawk sengin risk lak an inhuam thu an sawi. Kuminah Timberlake catalog chu an lo leisak tawh a, music industry lama mi hming thang tak tak Jack Antonoff, Mark Ronson, Timbaland-te pawh an lo leisak tawh bawk a ni.