Mizoram Cancer Care Foundation pualin MDM-in Musical & Food Fest 2022 Charity Concert buatsaih dawn

Music Domain Mizoram (MDM) chuan Krismas leh Kumthar inkar, 29.12.2022 (Ningani) tlai dar 3:00 pm aṭanga zan dar 9:00 chhungin AR Ground, Lammualah Charity Concert a buatsaih dawn.

He Charity Concert hi 'Cancer Care Foundation' puala buatsaih tûr a ni dawn a, artist zaithiam tak takte zai ngaihthlak tur a awm dawn bakah, Food Stall-te siamin, ei leh in tuihnâi tak tak chhawpchhuah a ni ang.

Charity Concert-ah hian luh man (ticket) siam a ni dawn lo a, a hmunah dam lo te puala bawm dawh a ni thung ang. Krismas leh Kumthar inkar boruak reh lai taka neih tûr a nih avangin a hun hi a fuh hle tûra ngaih a ni. Chhungkuaa hun hlimawm tak hmanna remchang a nih bakah, Cancer natna vei, sum tam tak mamawh tute tan bâwm dawh a ni tûr hi i tel ve ngeina chi a ni e. Ṭanpui ngaite tana luangchhuak ṭhin hnenah Pathian a inpuang a, a malsawmnain min vur ṭhin a ni.

MDM hian a rêl dan hmasa zawkah chuan 'Winter Blast 2022' hman an tum. Mahse a hun leh hmun an ngaihtuahin huau huau a liam ringawt loin, ei leh in tuihnai tak nena hun hlimawm tak hmanho a rêl leh ta zawk a ni. Chu pawh a lo thlawn hauh loin Cancer natna veite pual liau liau tûr a ni dawn bawk a ni. Gospel Artiste & Lengzem Artiste ṭha tak takte an zai dawn a. Mizorama kan band neih ṭhatte an zai dawn bawk a, mit leh beng a tlai dawn a, eitûr tuihnâi tak hmangin kan puârin kan fân thei dawn bawk a ni.

Cancer vêi dam lo, sum leh paia harsa tak takte tan rawn luangchhuak ve ang che.