Kan album thar tur hi lehkhabu angin ngai ula, Hla awmte chu bung hrang hrang angin: Amy Lynn Lee

American goth rock band Evanescence chuan kumin chhung ngei hian album thar an tichhuak dawn tih a chiang tawh a, April 24 khan an album thar tura mi an single hmasa ber 'Wasted on You' chu tichhuak tawhin, hei hi kum kaw chhunga hla thar hlak an tihchhuah leh hmasa ber a ni hial.

Evanescence fan, an album thar tur nghakhlel tak takte tana hriat chakawm tur tak  vocalist leh band co-founder ni bawk Amy Lee chuan Scroll.in hnenah a hrilh a, an lar ṭantirha a huntawn chungchangte a hrilh bawk.

"Kan band inthlak danglam danah ka rilru ka pek rualin leh kan music thar turah nasa taka phurna ka neih lai hian, kan bul­ṭanna kha ka la ngainain ka la hre reng a, kan music hlui ka ngainatna kha kalsan ka tum chuang lo a ni," a ti. 

Evanescence album thar tur hi  'The Bitter Truth' tih a ni dawn a, tlangzarh hun tur an la puangzar lo a, kumin chhung ngeia tlangzarh a nih dawn thu erawh Amy hian a lo sawi tawh thung.

Lee chuan an hla hmasate ang lo takin an band chuan an album thar turah hian strings emaw orchestral instrument emaw an la hmang lo tih a sawi a, electronic instrument synthesizer, arpeggiator leh sound effect-te an hmang zawk niin a sawi.

'The Bitter Truth'-ah hian Alice in Chains pawh lo thawhpui tawhtu Nick Rasculinecz chu producer a ni dawn a, Lee chuan an hla thluk kalphung an her danglam dawn  niin a sawi bawk.

Kum 38 lai ni ve ta Amy Lee chuan,"Kan album thar tur hi lehkhabu angin ngai ula, hla awmte chu bung hrang hrang angin ngai bawk ru," tia sawiin an hlate chu dahkhawm chuan thawnthu ang deuh a ni dawn a ni, a ti.

Mi tam takin lar hi an chak laiin mi larte hian larna hmachhawn hi harsa an ti ve ṭhin hle thunga, an zo lo fo reng bawk.

'Bring Me To Life' leh 'My Immortal' hmanga khawvel an den chhuah lai khan Amy Lee hi kum 21 mi chuah a la ni a, khawvel hmachhawn harsa a ti ve ṭhin hle. Scroll.in hnenah pawh hian,"Engkim a inṭan lai khan ka la naupang hle. High School ka zo chiaha record siam turin inremna ka ziak nghal a, 'Fallen' kha kan buaipui nghal a ni. A chang chuan phurawm viau mah se, hlauhthawnna, mal taka inhriatna leh mak tihna ka ngah ṭhin. 

"Khawvelin kan music an ngaihlut em em laiin ka nau, mipa naupang dam lo bulah pawh ka awm thei lo. Larna khan ka duh aia nasain min lansarhtir a, kum naupang te mai ka la nih avangin hriatthiam harsa ka ti. 'Introvert' ka nih bawk avangin harsa ka ti ṭhin hle a, mahse ka inthunun a, ka harsatna chu muangchanga sutkian dan ka thiam chho ta a ni," tiin a sawi.

Kum 21 mi lek a nih laiin 'Fallen' album kha an tlangzarh a, chumi hnu lawkah an band bul ṭanpuitu pawimawh David Hodges chuan band a chhuahsan. 'Fallen' vang chuan Grammy award pahnih an dawng nghal thung. Hlawhtlinnain an beisei phak bakin a umzui a ni.

Hmeichhia a ni a, an guitarist leh naupan lai aṭanga a ṭhian ṭha ber, Evanescene a dinpui Ben Moody nen an inkar boruak a  chhia a, 'Fallen' tilara tour an neih laiin Ben chuan band a chhuahsan ve leh a, an tleirawl chhuah aṭ-anga a hriat tawh an bassist Will Boyd pawhin concert liantham nei tura chhuah tlin tawh loa a inhriat avangin band a chhuahsan ve leh bawk. Hetiang chung hian vawiin thleng hian Evanescence hi chhel takin a la kalpui a, Amy Lee hi hmeichhe paukhauh tak a ni tih chu a chiang reng mai. 

Kum 2003-a 'Fallen' an tih­chhuah kha a hlawhtling hle a, album pawh an hralh hnem hle. Kum 2007-ah 'The Open Door' album an tlangzarh leh a, hei pawh hi a la lar rem rem hle a a ni. Mahse kum 2011-a 'Evanescence' an tihchhuah leh kum 2017-a an hla hlui ho version hranga an dahkhawmna 'Synthesis' pawh khan beisei a pha lo hle.

Band line-up an thlak nasa a, tunah chuan original member-ah amah Amy Lee chiah hi a awm tawh bawk nen, tunhma angin huhang an ngah ta lo. Kum 20 dawn liam taa  an dinhmun ang kha chu an pha tawh dawn lo niin a lang a, 'The Bitter Truth' hi eng nge an anpui dawn tih chu hriat a chakawm tawh hle a ni.