Twitter-a thawkte in lam aṭanga thawh phal­sak an ni

Twitter chief executive officer (CEO) Jack Dorsey chuan an company-a hnathawkte chuan an duh a nih phawt chuan in lam aṭangin an thawk reng thei rih dawn tih sawiin, hri lengin ziaawm lam a pan theih loh avangin tiam chin awm loin in lam aṭanga hna an thawh a phalsak.

Covid-19 hri leng vangin March thla aṭang khan Twitter-a thawkte chuan social distancing zawmin office kal loin in lam aṭangin hna an thawk ṭan a, he hri leng hian ziaawm lam a pan mai loh avangin Twitter company bakah US-a company hrang hrangte chu office kal hlei thei loin an awm mek a ni.

Dorsey chuan an company-a hnathawkte chuan email hmangin hna ṭha takin in lam aṭangin an thawk thei tho tih a sawi a, he hi chhunzawm zel a la nih tur thu leh September thla hma chuan office an kai theih a rin loh thu a sawi bawk.

Twitter-a thawk tam ber hi nakkum thleng hian an zin chhuak thei dawn lo a, chutih rual erawh chuan in aṭanga an thawh avang hian an hlawh chu $1000 ṭheuha tihpunsak an ni thung.