Avatar-in USD tld 1 hailut tling tawh

Kumin film tlangzarh zinga mite ngaihven ber pawl, Avatar film chhunzawmna 'The Way Of Water' chu Box Office dinhmun thar ber atanga a landanin nimin khan USD tld 1 chuang a hailut tling tawh.

December 16-a khawvel huapa tlangzarh a nih atanga ni 14 hnuah, Billion Club-ah a lawilut. Avatar 2-ah hian film hmasa lama kan hmuh Sam Worthington, Zoe Saldana, Stephen Lang, Michelle Rodriguez leh Sigourney Weaver chuan an role pawimawh an chang chhunzawm leh a. Hmelthar pahnih, Kate Winslet leh Michelle Yeoh te'n an rawn belh bawk a ni.

Chhut danin US bikah USD mtd 317 vel a lalut a, North America pawn lam international market atangin USD mtd 712 vel a thawkchhuak. Thawhlehni thlenga Global Box Office-a a lakluh zat hi USD tld 1.028 vel angin an chhut. Film tlangzarh zinga billion-dollars hmu rang thei film parukna a ni.

Avatar hmasa ber khan kum 2009 khan billion-dollars thawkchhuak turin ni 19 hun a hmang. Avatar 2 hi India ramah pawh a hlawhtling thawkhat hle a, Rs vbc 250 chuang a lalut tawh a ni.

Avatar: Way of Water in Thawhlehni thlenga sum a lakluh dan:

North America - USD mtd 315

China - USD mtd 109

France - USD mtd 68

South Korea - USD mtd 57

Germany - USD mtd 47

India - USD mtd 40.50

United Kingdom - USD mtd 37

Mexico - USD mtd 29

Australia - USD mtd 25.50

Italy - USD mtd 24

Spain - USD mtd 21.50