Sushant Singh Rajput kha mahni intihlum ni loin, mi kut tuara thi a ni : Report

Bollywood lemchanthiam, kum 2020 lama mual liam ta Sushant Singh Rajput-a chanchin chuan thawm a rawn nei thar leh ta. Sushant thih atanga kum hnih hnu ah a ruang endik laia awm ve Cooper Hospital staff chuan Sushant hi mahni intihlum ni loin, midang kut tuar 'murder' vanga thi a nih thu a sawi.

Mumbai-a Cooper Hospital autopsy staff member, Roopkumar Shah chuan postmortem an neih lai khan actor fam ta taksaah khan kut thlakna hnu hma te, a mitah vawi duai lo hnekna hnu hma te chu chiang taka a lan thu leh, a nghawnga inawhhlumna hrui hrual thla langte chu mahni inawh hlumna ni loin, midang reh hlumna hnu hma zawk a nih zawk theih thu a sawi chhuak.

Sawi chhunzawmin, Shah chuan Sushant khan hliam na tak a tuar a, a ruhte pawh a tliak nual a ni, tiin Sushant taksa a hmuh khan mahni intihlum ni loin thah a ni a, hei hi police leh dawmdawi-in lam thuneitu sang zawkte hnenah pawh thlen mah se, an bengkhawm duh loh thu a sawi.

Sushant thihna hi mipui thinlungah a thi thei lo a, Cooper Hospital hnathawk a rawn tawngchhuak leh hian mite rilru a tibuai hle. A hun laia tawngchhuak duh si lo, tun a taka a rawn tawngchhuak leh hian rilru ah zawhna tam tak a siam phah leh a ni.

Sushant Singh Rajput hi June 14, 2020 khan Bandra-a a chenna inah a ruang hi hmuh a ni. SSR hi ceiling-a inawkhluma hmuh a nih avangin report chuan mahni intihlum ang in a tarlang. Cooper Hospital-a postmortem report chuan a thih chhan chu oxygen tlachham, asphyxia niin a sawi. Mahse SSR chhungte chuan post-mortem report phenah hian thil inthup a awm ngei an rin thu sawiin, report hi an pawm theih loh thu vantlang hriatah an lo puang tawh a ni.