Damlo leh mi harsate tan Ariana Grande a luangchhuak

Multi-Grammy-winning artist, Ariana Grande chu Royal Manchester Children’s Hospital Charity-a damlo enkawl lai te leh, chanhai zawk te tan luangchhuakin, an hnenah Krismas thilpek thahnem tak a pe.

Hospital charity chuan Thawhlehni khan Ariana thilphalna leh inpekna chu lawmawm an tih thu twitter-ah an tarlang. Heng a thilpek hlante hi area hnaiah damdawi-in pali, Royal Manchester Children’s Hospital, Trafford General, Wythenshawe Hospital leh North Manchester General Hospital-ahte sem zai leh an ni.

Kum 2007-a Ariana-in Manchester Arena-a concert a neih tum khan mi pakhat chuan bomb tipuakin mi 22 an thih phah a, thahnem takin hliam an tuar bawk a ni. He pawikhawihna avangin heng damdawi-inte nen hian inzawmna thuk tak an neih phah a, kum hmasa lamah pawh heng damdawi-inte tan hian a lo luangchhuak tawh a ni.

May 22, 2017 khan suicide bomber, kum 22 mi Salman Abedi chuan England hmarthlang khawpuia Ariana concert-ah thihchilh bomb tipuakin mi 22 zet an thih phah a, mi 59 velin hliam an tuar bawk a ni. He pawikhawihna rapthlak tak thlen hnua Ariana chetdan chu chhuanawm an tih em avangin Manchester-a thuneitute sangte'n Grande hi 'honorary citizen' nihna an pe a ni.

Pawikhawihna a thlen atanga kum li liam hnuah Ariana hian a concert-na a nunna chantate hriatrengna hun hmangin, "Lungngaihna nasa takin min tlakbuak mah se, a kum telin kan inzawmna erawh a thuk tial tial a ni. Heng ni bikah hian ka rilruah in awm reng a ni tih theihnghilh ngai suh ang che u," tiin kaltate thlahna thu a sawi.