Kumtharah; Miley thar a chiang ta

Miley Cyrus chuan rimawi khawvelah hun enge maw ti chen thawm lian tham nei loa a awm hnuah, kumin hi kum chhinchhiah tlak bikah chantir a tum thu sawiin, kum 29 mi zaithiam chuan tun thla ni 13 hian single thar "Flowers" chu a tichhuak dawn ta.

Miley hian social media lamah amah tha zawk, "New Year New Miley" an hmuh tur thu fans hmaah a lo puangzar tawh a, tunah chuan phat rual lohin a chiang ta e.

Nikum November thla atangin studio-ah hun a hmanglai hi a social media lamah hmuh theihin a pholang tan a, kum 2013-a a studio album palina buaipuitu music producer, Mike WiLL Made-It bakah hip-hop duo, Rae Sremmurd-te nen music buaipuiin hun an lo hmang tawh a ni.

Miley hian studio album puitling pasarih, Meet Miley Cyrus (2007) Breakout (2008), Can't Be Tamed (2010), Bangerz (2013), Miley Cyrus & Her Dead Petz (2015), Younger Now (2017) leh Plastic Hearts (2020)-te a lo tlangzarh tawh a ni.

A single thar tur "Flowers" MV teaser chu mipui hmuh theiha rawn phochhuakin a single thar hi a pasal hlui, Liam Hemsworth pianchamah tak a tichhuak dawn a ni.