Rolling Stone "200 Greatest Singers of All Time"-ah Aretha Franklin pakhatna; Celine Dion hming lang loin sawisel a hlawh

Rolling Stone chuan "200 Greatest Singers of All Time" list an tihchhuahah Celine Dion hming a lan loh avangin rimawi khawvela mi langsarte'n an lungawi loh thu an auchhuahpui a, he an lungawi lohna hi chhangletin, magazine chuan artist-te chu an aw (voice) vang ni loin, zaithiam "singers" an nihna zawna thlang an nih thu an sawi.

"In ngaihdan in puanchhuah hmain, hei hi Greatest Voices List ni loin, Greatest Singers list a ni tih in rilruah min lo hriatsak ula kan ti hle," tiin Rolling Stone chuan Thawhṭanni khan thuchhuah an siam.

"Queen of Soul" tiha hriat lar Aretha Franklin chu pakhatnaah awmin, India mi famta Lata Mangeshkar chu list-ah 84-na dinhmun a hauh a ni.

List-a hming langsar zualte

200 Greatest Singers top 10-ah hian Aretha Franklin bakah, Whitney Houston, Sam Cooke, Billie Holiday, Mariah Carey, Ray Charles, Stevie Wonder, Beyonce Knowles, Otis Redding leh Al Green-te hming pawh a lang.

List-a artist hming langsar ṭhenkhat zingah Ozzy Osbourne (112), Kurt Cobain (36), Bruce Springsteen (77), Mick Jagger (52), Patti Smith (117), Elton John (100), Bob Dylan (15), Johnny Cash (85), Lady GaGa (58), Taylor Swift (102), Usher (97), Selena (89), The Weeknd (110) leh George Michael (62)-te chu zaithiam list-a lang ṭhenkhatte an ni.