Hunpui chhungin Avatar 2 in en a hlawh

Kum 2009-a tihchhuah Avatar chhunzawmna, "Avatar: The Way of Water" chu hunpui laiin theatre lamah a che ṭha rem rem hle. Variety-in a tarlan danin, Avatar chhunzawmna hian khawvel huap box office-ah ni 14 chhung lekin USD tld 1 a hailut thei a, kum 2022-ah hetiang ang zat sum lalut chak an awm lo.

Nikum chhung khan film pathum 'Top Gun: Maverick', 'Jurassic World Dominion' leh 'Avatar 2' te chauh hi USD tld 1 lalut thei awmchhun an ni.

The Way of Water hi kum 2021-a tihchhuah 'Spider-Man: No Way Home' tih loha USD tld 1 lalut rang thei ber a ni.

Avatar 2 hian North America lamah sum hailut tam berin, China (USD mtd 100.5) chuan dawtin, Korea (USD mtd 53), France (USD mtd 52.3), India (USD mtd 37), leh Germany (USD mtd 35.7) te'n an dawt a, a film hmasaa USD mtd 116 zet a lakluhna Russia-ah erawh tihchhuah a ni lo thung.

Avatar film hmasa zawk khan khawvel pumah USD tld 2.97 vel a lalut tawh a, Covid-19 hripui len hnuah box office aṭanga sum lakluh hi a tlakhniam tak avangin heti zat sum lakluh chu thil harsa tak a ni chho thei dawn a ni.