Metallica hla hit "Enter Sandman" Spotify-ah stream tld 1 nei tling

Spotify-ah American heavy metal band, Metallica hla ngaihthlak hlawh ber "Enter Sandman" chuan stream tluklehdingawn 1 a nei tling ta a, rock hla zingah hetiang mel lung pawimawh siam thei hla tlemte zingah a chuangkai a ni.

Metallica hi 'Spotify billion elite club'-ah AC/DC, Arctic Monkeys, Linkin Park, Nirvana, Bon Jovi, Oasis, Panic! at the Disco, Queen, Radiohead, The Killers, The Police, Twenty One Pilots-te nen rock leh metal act zinga stream tld 1 nei thei huangah a rawn invawrh a ni.

"Enter Sandman" hi kum 1991-a tihchhuah, 'Black Album' zinga mi kha a ni a, Billboard Mainstream Rock Chart leh Billboard Hot 100-ah top 10-a inhlangkai ve ve a ni. An bassist Jason Newsted chuan a tirah he hla hi mawi tichiah lo mah se, an nun thlak danglam dawrh thei hla a nih thu sawiin, "Kan hla nem ber chu kan hla rorum tak takte tan kawng sialtu pawimawh leh khawvel huapa mite min hriat theihna chhan a lo nih phah ta a ni. Ram 35-ah kar khat chuangte pakhatna an ni thei a, kan la kal ngai miah lohna ram pasarihah pakhatna kan ni thei phei kha chu mak kan ti hle a, band dang chungah hetiang thil hi a thlen ngai pawh ka hre lo," tiin an band tan he hla pawimawh zia a sawichhuak.