British media chungah Prince Harry a lawm lo; Thlahpawlh a nih vangin ka nupui an endan a dang : Prince Harry

Duke of Sussex, Prince Harry chuan "60 Minutes"-in an kawmnaah, khatih laia a ngaihzawng tuna a nupui ni ta Meghan Markle nen an inzui ṭan tirh khan thutlukna a siam sual loh zia a hrechiang hle tih sawiin, kawng dik tak a zawh tawh nia a ngaih thu a sawichhuak.

"Meghan-in a hun paltlangte kha Kate [Middleton] leh [Queen] Camilla-te tawn nen kawng enge maw chenah chuan inanna lai an nei," tiin Harry chuan a nupui chu mingo leh mihang thlahpawlh a nih avanga British media te'n an endanah a lawm loh thute a sawi. "Chi inthliarna rawngkai chu British media-te chaw tui ber a ni chho char char a. Heti khawp hian British press hi mahni hnam atchilh an ni ang tih ka ring pha ngai lo." a ti.

Hei hi Harry leh Meghan ten British press an sawisel vawi khatna a ni lo. Kum 2020-a lal chhungkua an chhuahsan bul ber pawh press mi te vang hi niin an sawi. "British press mite khawsak dan ka hriatchian em avangin ka rilru hriselna thlengin a tawrh phah a ni," tiin, "Tur hlauhzawm tak ang hi an ni. Pasal leh chhungkaw pa tih tur dik tak chu ka ti ta a, ka chhungkua chu ka inthiarfihlimpui a ngaih phah ta a ni," tiin "The Late Late Show With James Corden" nen kum 2021-a an inkawm ṭum khan a lo sawi tawh nghe nghe.

Kum 2019-a Meghan-in a pa, Thomas Markle hnena a lehkhathawn a put ruk vangin Pathianni khan he lehkhathawn lo chhuahchhawngtu pahnih, Associated Newspapers leh Mail-te chu an privacy palzut sakah puhin an lakah thubuai an thehlut a ni.