March thlaah Miley Cyrus album thar ‘Endless Summer Vacation’

Kum 2023 a inṭan chauh tihah, Miley Cyrus chuan mipui hnena a lo intiam tawh angin rimawi khawvelah a lo kir dawn tih a nemnghet tawh a, kan hma lawk March ni 10 hian album thar leh, a studio album pariatna tur ni bawk "Endless Summer Vacation" chu a tichhuak dawn.

Kum 30 mi, pop star chuan kar hmasa lawk khan a album-a hla hmahruaitu single thar “Flowers” chu a tihchhuah tur thu a lo puang tawh bawk.

Miley chuan a social media account-ah a album thar pual liau liau in, teaser video tichhuakin, a cover photo aṭanga a lan dan chuan nipui boruak rawn inherchho turah Miley chuan a hla hmangin rawn chet ngap a tum hmel viau. Album-a hla awm chungchangte sawiin, Miley chuan Los Angeles-a cham chhunga a rilru ngaihtuahna leh taksain hma a sawnnain amahah inrintawkna nasa tak a hmuh avanga hmangaihna lehkhathawn (love letter) thawnletna lam hawi tiin a sawilang.

New Year’s Eve khan, NBC special 'Miley New Year’s Eve Party,'-ah Miley chuan January 13 hian a lead single “Flowers,” chu tlangzarh a tum thu a puang a, single thar a 'drop' ni tak hi a pasal hlui Liam Hemsworth piancham a ni tel tih hriat tel a ṭha hle. Miley hian a hla thu hmangin eng thawnthu tak rawn hril leh ang maw?