Paul Baloche album thar tur 'Behold Him' Kari Jobe leh Leslie Jordan a thawhpui

Lenny LeBlanc nena an hla phuah 'Above All' hmanga khawvel dengchhuaktu Paul Baloche chuan February 28 hian album thar 'Behold Him' a tlangzarh dawn.

Baloche hian a album thar tur title hla 'Behold Him' hi single-in nikum khan a tichhuak tawh a, tunlai khaw­vela worship hla lar ber zinga mi a ni leh der tawh. He hla hi Kim-Walker Smith nen an sa dun a, thla thum lek chhungin khawvel hmun hrang hranga inkhawmnaah an hla sak tam ber zinga mi a ni tawh a ni. He hla hi Lincoln Brewster leh Chris McClarney-te nena an phuah a ni nghe nghe. Sam 41-na behchhana phuah a ni bawk.

Zirtawpni liam ta khan he album-a hla pakhat 'What A Good God' lyric video a tichhuak bawk a, a album thar tlangzarh tur hi Gospel music lam tuipuitute chuan an nghakhlel tawh hle ngei ang.

'Behold Him' hi a album 22-na tur a ni tawh a, 'Open The Eyes of My Heart' a tlangzarh aṭang khan kum 20 zet liam tawh mah se a rilru puthmang erawh a la ngai reng tih sawiin Baloche chuan," Thinlung ngai reng kha a la auchhuak niin ka hria- Lalpa hmuh duh tak takna kha. Pathianin he ka nun leh tun chhuan awm meka a thiltih hi hmuh hmaih ka duh lo a ni. Amah ka hmu duh a, ka ngaithla duh a, ka zui duh bawk a ni," tiin a album thar tur chungchang hi a sawi.

Paul Baloche hian a project tihchhuah tawh hrang hrangah Gospel artist lar tak tak a thawhpui tawh ṭhin. A album hmasa hoah khan Michael W Smith, Matt Redman leh Casting Crowns-te pawh a thawhpui tawh a, a album tlangzarh leh turah pawh hian mi lar tak tak a thawhpui leh a ni.

"Ka hla phuah, ka album record leh khawvel puma minis­try ka kalpuinaa ka rohlu chharchhuah chu ṭhian ṭha tak ka neihte hi a ni," tia sawiin a album thar turah pawh hian mi hrang hrang a thawhpui leh tih a sawi.  Kim Walker-Smith (Jesus Culture), Kari Jobe, Matt Redman, Chris Brown leh Steven Furtick (Elevation Worship), Leslie Jordan (All Sons and Daughters), Amanda Cook, Mitch Wong, Mia Fieldes, Jason Ingram leh Ben Cantalon-te chuan a album tharah hian an thawpui tih sawiin anni hian an aw an thawh mai piah lamah hla phuah kawngahte pawh an pui bawk.