Avatar nekchhuak turin 'M3GAN' a hlauhawm tawk lo

Universal leh Blumhouse creepy doll thriller film, “M3GAN” chuan tlangzarh karah USD mtd 30.2 lalut mah se, kar li chhung a zawna pakhatna dinhmun lo hauh tawh James Cameron kutchhuak, Avatar 2-in USD mtd 45 lai a lo lalut leha, Avatar meuh nekchhuak tur chuan a la hlauhawm tawk lo a ni.

USD mtd 12 lek senga siam M3GAN chu..
M3GAN hi 'Model 3 Generative Android' tihna a ni a, North America theatre 3,509 aṭangin USD mtd 30.2 chuang lalut tawhin, he film siamnan USD mtd 12 chauh an seng. An senso ngaihtuah chuan hlawhtling tak a ni. PG-13 film hian USD mtd 17-20 inkar vel lalut tura beisei ni mah se, mipuiin an hlut a, an beisei aiin a hlawhtling nghal der tawh a ni. M3GAN hi roboticist (Allison Williams) an a vahnu (Violet McGraw) awmtleina tura AI hmanga a siam niin, he khawl hi an chhungkaw tan anchhiaah rawn chang zuiin, hmuhnawm takin an rawn changchhuak a ni.

“M3GAN” hi kum 10 bi chuang hnuah kumthar kara USD mtd 30 chuang lalut thei film hmasa ber niin, kum 2012-a tihchhuah “The Devil Inside” khan USD mtd 33.7 a lalut bawk a ni.

Sawi hmaih thiang loh Avatar
Hetihlai hian, kar li chhung a zawna box office roreltu, Avatar 2 chuan a chetṭhat a la chhunzawm zel a, theatre 4,340 aṭangin sci-fi epic film hian USD mtd 45 a lakluh belh a, North America bikah USD mtd 516 lalut tawhin ram dang aṭangin USD tld 1.1 a lalut tawh a, a sum lakluh belhkhawm hi USD tld 1.7 zet a tling. Tihian, Avatar 2 hi film tlangzarh tawha sum lakluh tam lamah pasarihna dinhmun a hauh leh der tawh a, USD tld 2 a hlat tawh lo hle.

“The Way of Water” leh “M3GAN,” ten ṭha takin kum bul an rawn ṭan chhoa, kum 2023 chu movie industry lamin hma a sawn chhoh zel pawh a beisei awm viau a ni.