Bo thana a than hnuah Kanye West mipui hmaah a inlan leh nawlh!

Rapper, Kanye West chu kar eng emaw zat bo thana a than hnuah Pathianni khan biakinah inkhawm tura a kal lai hmuh a ni.

Thla hmasa khan Yeezy designer leh a business manager hlui, Thomas St. John chuan Ye hi a biaktlang theih loh avang leh an inah hmuh tur a awm loh avangin a bo niin thuthang a rawn thehdarh. Thomas chuan, Ye hi kar eng emaw zat chhung chu Ye a hmuh tawh loh thu court hearing-ahte a sawi lang hial.

Hemi hnuah, Daily Loud chuan December 28 khan "Kanye West chu hmuh a la ni lo a, a business manager hlui chuan kar enge maw zat a zawn hnuah pawh a la hmu zo lo a ni," tiin an tweet. Hei hian mipui beng a verh nghal hle a, lo awih tawk pawh an ṭhahnem hman hle a nih kha.

Hetih laiin, fans te chuan Thomas chu thuthang dik lo vawrhvir tumah an puh thung. Ṭhenkhat erawhin Kim Kardashian pasal hlui hi an lawsuit avanga pil bo san tumah an puh ve thung.

Ye chuan Thomas hi thlatin USD nuai 3 hlawha Donda CFO hna thawk turin a ruai a, mahse, Thomas-an thla 18 chhung contract a ziah hnuah Ye hian a thlabi hlawh chu a pek tlak leh si loh avangin Thomas chuan USD mtd 4.5 chawi turin Ye hi a khing let a ni.