Science & Environment: Kum 10 bi rei lote hnuah kan Ozone layer hi siamṭhat a ni thei : United Nations

Mihringin kan chenna leilung min tuamtu, Ozone layer chhanchhuah tuma an thawhrah chu kan tel chho zel dawn niin a lang a, tun aṭanga kum 10 bi (decade) rei lote hnuah ngai a awh leh mai theih thu UN chuan a sawi.

Kum 1987-a international agreement siam angin, kan chenna leilung tuamtu (layer) tichhe thei chemical hlauhawm pechhuak ṭhin titawp tura inremna an ziah chu a hlawhtling chho zel niin zirchianna chuan a tarlang.

Ozone layer hi kan chenna khawvel tuamtu pan te, Ni(sun) aṭanga ultraviolet radiation (UV rays) lo hiptu a ni. Ozone layer pawp emaw pan zel emaw hi mihring leh nungcha dangte tan a hlauhawm thei a. UV rays hian kan DNA tichhiain, sunburn a thlen thei a, vun lam natna hrang hrang bakah skin cancer thlengin a thlen thei. Mithiamte chuan Ozone layer hi kum 1970 aṭang khan a pawp ṭan niin an sawi. Spray cans, fridge, foam insulation leh air conditioner aṭanga hmuh theih Chlorofluorocarbons (CFCs) chu ozone layer ei chhetu lian takah puh an ni bawk.

Kan chenna tuamtu pawp chak tak chu kum 1985 khan scientist-ten an hmuchhuak a, kum hnih hnuah ram 46-te'n chemical hlauhawm tak tak pechhuak tawh lo turin inremna, Montreal Protocol chu an ziak a ni.

He inremna hi UN hnuaia inremna hlawhtling ber pawla ngaih niin, 99% te chuan ozone tichhe thei chite chu an hnualsuat zui vek a ni. UN, US leh EU agency-te chuan thuchhuah inṭawm siamin, an beisei anga Montreal Protocol chu a hlawhtlin thu an sawi. Hetiang renga dan leh dun siamte zawm chunga kan kal chuan kum 1980 hunlaia ozone awmdan kha kan phak leh thei dawn a ni, an ti.

Solar radiation vangin ozone chu pawp zau zel mah se, sik leh sa inthlak, climate change thlen chhan ber erawh a nih loh thu an sawi.