Golden Globe award semchhuah a ni; A vawi khatnan India hlain chawimawina a dawng

Film leh TV lama mi hmingṭha bik te chawimawina, Golden Globe awards vawi 80-na chu Thawhlehni zan khan Beverly Hilton-ah semchhuah a ni. Film siamtu ropui Steven Spielberg -a'n a zinkawng ngaihnawm taka a lantirna "The Fabelmans" leh, Martin McDonagh kutchhuak dangdai tak, dark tragicomedy film "The Banshees of Inisherin" te'n film lama chawimawina sang an dawng a, 'Abbott Elementary', 'House of the Dragon' leh 'The White Lotus' ten TV series chawimawina ngaihhlut an hum haw thung.

Mimal chawimawina dawngtu zingah Quinta Brunson, Tyler James Williams, Angela Bassett, Ke Huy Quan, Colin Farrell, Jennifer Coolidge, Steven Spielberg, Michelle Yeoh, Julia Garner, Zendaya, Guillermo del Toro, Cate Blanchett leh Austin Butler-te chu hming langsar zualte an ni.

Eddie Murphy hnenah 2023 Cecil B. DeMille Award hlan a ni a, Eddie chuan "In chhiah pe ṭha ula, in tihtur chauh ngaihtuah ula, chuan Will Smith-a nupui hming lam ri hlek suh ang che u," tiin pa fiamthu thiam chuan nikum Oscar-a thil thleng chungchang fiamthu nan a hmang zui.

Mihang awm loh vanga sawiselna kha..
Los Angeles Times chuan kum 2021 khan, chawimawina dawng tur thlangchhuaktu Hollywood Foreign Press member 87 zingah mihang pakhatmah an awm loh avangin chi inthliarna an lantir tiin thuchhuah a siam bakah, kalphung fel tawk lo leh sum tihchingpenna lian tak a awm thu a tarlan vangin nikum khan TV kaltlanga pekchhuah loh an rel a ni. Entertainment industry aṭangin dodalna an tawk a, HFPA kalphung chu ennawn tura an ngiat piah lamah member-te chu thilpek dawng thei tawh lo tur te leh, internationally based voter mi 103 rawt belh tura an ngenna a hlawhtlin hnuah NBC chuan kumin aṭang hian an pechhuak leh ṭan a ni.

HFPA kalphung fel tawk loh avang hian celebrity tam tak chuan an lungawi loh thute tlangau puiin, award semnaah kal an tum tawh ngai loh thute thlengin an lo sawichhuak tawh a ni.

India hla "Naatu Naatu"-in chawimawina a dawng
India mi, SS Rajamouli chuan nomination pahnih a hmu a, "Naatu Naatu" hmangin Best Original Song award a dawng a, Best Non-English Language Film-ah erawh a vanduai ta thung. RRR hian khawvel huapah pawh mi lawm a hlawh hle a, cheng vbc 1,200 chuang zet a hailut tawh a ni. Hei bakah, RRR hian New York Film Critics Circle awards-ah Best Director lawmman a lo humhaw tawh a, Oscar category hrang hrangah a hming hi sawilan niin, nomination pakhat emaw a a aia tam a hmuh ngei a rinawm hle.