Blue Wave Records label aṭangin zaithiamte'n kum 2022 chhungin Rs nuai 6 chuang lalut: Mizoramah Music Streaming platform-in hma a sawn zel : Bza Sailo

Mizoramah mumal taka record label anga kal hmasa ber, Blue Wave Records Label chuan khawvel ram changkang zawkte rualin ke an pen chho zel a, hun rei tak chhung streaming tihlar tumin an lo bei tawh ṭhin. Tunah chuan an hnathawhte'n hmasawnna a nei chho ṭan mek. Blue wave records label aṭang hian Mizo zaithiam te'n an hla streaming aṭanga an hlawkna (royalty) hmuh hi cheng nuai 6 chuang a ni hem tawh!

Zaithiam eng emaw zatin Blue wave Records label-ah hian an hlate an khung tawh a, heng streaming platform Spotify, itunes, Amazon music, Youtube music, Instagram, Facebook, Tiktok leh a dangahte dahsakin, copyright-te an buaipuisak ṭhin. Youtube-a an hlate claim-in royalty hi a hla neitu/satu hnenah a luang lut ta a, an hla lo hmangtute hnen aṭangin awlsam takin royalty an hmu tawh a ni. Blue wave records hian 'St ange' a thawhpui mek bawk.

Blue Wave Records neitu leh producer ni bawk, Bz Sailo chuan "Zaithiamte chuan streaming platform lamah an hlate dah uar deuh se, Youtube lama kan zai leh kan music-te, kan hla phuahte a thlawna dah mai loin, kan hah man hi a tel theih a ni tih hria i la, hei ai hian copyright-te uar zawkin kalpui a, youtube chiaha dah aiin sum lakluh (earnings) a ṭha zawk tihte hriat a pawimawh awm e," tiin zaithiamte chu streaming platform lamah an hlate hei aia dah uar turin a chah.

Blue Wave hian hmachhawp lian tak tak an neih nual thu sawiin, hla phuahtu lamte nen thawhhona ṭha neih te, zaithiamte chawilarna lam, artist development hi an kalpuina a rei tawh, tiin Bza chuan Vanglaini a hrilh.