Guitar Legend Jeff Beck a thi

Kum 1960 chhoa Bristish mi, ṭingṭang perh thiam hmingthang Jeff Beck chu kum 78 mi niin Nilaini khan a thi.

Jeff hian natna chi khat, 'bacterial meningitis' chu a kai tih hmuhchhuah a ni a, enkawlna mumal a dawn hmain a thih thuin min ṭhawng zui a ni.

"Bacterial meningitis a kai tih kan hrechhuak thuai a, he natna hi a taksa chuan tuar loin nimin khan thlamuang takin mual min liamsan ta a ni," tiin an chhungkaw aiawha thuchhuah chuan a tarlang.

Beck hian genre hrang hrangte chu thiam takin a perh thei a, rimawi a perh tam zawk erawh rock, blues leh jazz fusion rawng kai an ni.

English rock band 'The Yardbirds' aṭanga hming rawn chher ṭanin, kum 1960 chhoa Middle Eastern leh Indian music lam hawi rimawi dangdai tak tak rawn vawrh lartu zinga mi a ni.

Beck hian a hnuah solo career hlawhtling tak a zawh leh a, artist ṭhahnem tak a thawhpui hnuah ama pualin band 'Jeff Beck Group' a din leh a ni. Electric guitar zut tawh azawnga a thiam ber pawlah mi tam tak chuan an ngai a, The Yardbirds leh a solo career vangin Rock and Rock Hall of Fame-ah vawi hnih lai lak luh a lo ni tawh a, Grammy award ṭum riat lai lo dawng tawhin, nomination vawi 22 a hmu tawh.

US pop culture magazine, Rolling Stone chuan Jeff Beck hi 'fifth greatest guitarist of all time'-ah thlangin, hei hian a thiam zia a nemnghet chiang mai awm e.