Vince McMahon-a'n WWE a hralh?

American professional wrestling promotion, World Wrestling Entertainment (WWE) neitu Vince McMahon chuan a company chu Saudi Arabia-a Public Investment Fund hnenah a hralh niin report thar ber chuan a rawn tarlang mauh mai.

Vince-a fanu, Stephanie McMahon-i'n kar liam taa company co-CEO dinhmun a kalsan hnuah, board of director ṭhukhawm chuan lungrual takin Vince McMahon chu Board Chairman-a kir turin an pawm New York Post chuan a tarlang. Nikum July thla khan Vince hi 'sexual misconduct' thubuaiah a inbarhluh avangin WWE-a a nihnate hi a lo kiansan tawh a ni.

WWE hlut zawng hi USD tld 6.7 hu vel nia chhut a ni a, McMahon rawn let hnuah phei chuan an company hlut zawng (stock) chu 25% in a pung leh tawh niin Post report chuan a tarlang.

WWE hi khawvela professional wrestling company lian ber a ni a, ram hrang hrangah broadcasting deal an nei a, thlunzawmna ṭha tak an siam. CNN tarlan danin, kum 1999 August thla aṭang khan neitu pakhat aia tam kutah a awm a, a hma zawngin McMahon chhungkuain an enkawl ṭhin tih a sawi.