Mizoram Cosplay Showdown pui taka neih a ni dawn!

Mizoram Cosplay Organization leh Tristan Event Management ṭang kawpin a buatsaih, Mizoram Cosplay Showdown chu January 26 & 27 hian Music Home, Zonuam ah neih a ni dawn ta!

He event-ah hian prizepool cheng nuai 1 chuang zet semchhuah a ni dawn a, puitling (adult) leh naupang (junior) category-ahte ṭhenhran niin, lawmman ṭha tak tak semchhuah a ni ang.

Adult category-a pakhatna hian Rs 10,000 a dawn bakah, July thlaa neih tur Nagaland Cosplay Event-ah Mizoram aiawhin a tel dawn a, an zin man hi event buatsaihtute'n an tumsak bawk dawn a, pahnihna aṭanga pangana thlengin tangkafai an hum haw bawk ang.

Hei bakah, adult leh junior category-a telte tan special award pathum Best Craftman, Most Entertaining Performance leh Organizers choice-te thlanchhuah an ni bawk ang.

Junior/Chibi Category-ah hian naupang kum 13 leh a hnuailamte chu pawisa chawi ngai loin January 23 thleng a inziahlut thei dawn a, eng character costume pawh ha in a tel theih reng a ni. Junior/Chibi top 5-te hian Rs 5000 ṭheuh leh, Trophy leh Certificate an dawng dawn a ni. Junior category bikte hi ngaihhnathiamna sang tak nen endik an ni dawn a, rules thlahdul viau tum a ni.

Intihsiaknaa tel turte chuan phone no. 8414094013/7009909179-ahte leh Instagram page @yonko.mizoram ah te zawhchian theih a ni.