Elvis Presley fa neih chhun; Lisa Marie Presley a thi

14th January, 2023

Kum zabi 20-na zaithiam lar zinga huhang ngah ber pawl, a zai thiam leh lam thiam em avanga "King of Rock and Roll" tih hming lemte pawh an lo pek hial, famta Elvis Presley fa neih chhun, singer/songwriter Lisa Marie Presley chu Ningani zan khan Los Angeles hospital-ah cardiac arrest vangin kum 54 mi niin a thi.

Lisa hi hmanni lawka an semchhuah, Golden Globe awards-ah khan a nu Priscilla Presley nen an inlan a, a pa Elvis Presley Biopic 'Elvis' chuan award a dawng nghe nghe a ni. Lisa hi Ningani zing khan Calabasas, California-a a chenna inah an housekeeper chuan thichhawngin a hmu a, a pasal hlui Danny Keough chuan paramedics rawn thlen hmain CPR-te pein theihtawpa a nunna chhan tuma beiin, damdawi-ina hruai a nih hnuah a thih thu hi an puang a ni

Lisa-i nu, Priscilla Presley chuan a fanu thih chungchangah thuchhuah siamin, "Thinlung lungchhe tak chungin ka fanu enchim loh chuan min kalsan ta tih ka rawn sawi a ni. Ka hriat tawha zawnga mahni thiltiha theihtawp chhuah ṭhin, mi chak leh hmangaihna ngah ber a ni." tiin kum 77 mi chuan hun harsa an tawh laiin an privacy zahsak turin mipuite a ngen.

Khawvel mi lar fa tih takah, Lisa Marie Presley hi kum nga mi lek a nih laiin a nu leh pate an inṭhen a, kum kua a nihin a pain a boralsan leh. Hringnun harsa tak a paltlang hnuah a nu leh pate hnung zuiin rimawi leh lemchan khawvelah a hmel kan hmu chho ṭan. Kum 2003 khan a album hmasa ber “To Whom It May Concern,” tichhuakin, a hla hit “Lights Out” chu unit 5,00,000 chuang zet a hralhchhuah avangin certified gold marking pek a ni. Hemi hnuah, a album pahnihna “Now What,” tichhuak lehin, hei pawh hi a hlawhtling hle a, heng a album pahnihte hi Billboard 200 top 10-ah a lanpui ve ve a ni.

Michael Jackson-an kum 1995-a a tihchhuah “You Are Not Alone” music video-ah pawh khan a inlan nghe nghe. MJ nen hian kum hnih chhung an innei a, lemchanthiam Nicolas Cage leh musician Danny Keough nen pawh hun rei tak an lo inzui tawh bawk. Lisa hian a nu, Priscilla Presley leh a fanu pathumte a kalsan a ni.