MZI branch thar hawn a ni MZI leh Art & Culture-in Zoawi rimawi kutpui buatsaih an tum

Mizo Zaimi Inzawmkhawm (MZI), Bawngkawn branch, Aizawl chu January 12, 2023 zan khan MZI Gen. Hqrs. President Er. Lalrothanga'n a hawng.

MZI, Bawngkawn branch hawnna hun hi Bawngkawn zau laiah buatsaih a ni a, MZI Patron R Lalzirliana hoin MZI Gen. Hqrs. hruaitu eng emaw zatin an telpui bakah, zaithiam ten kalkhawmte zaiin an awi bawk.

MZI President Er. Lalrothanga'n MZI, Bawngkawn branch a hawn rual hian branch tharin an mamawh tur hrang hrang, seal leh ṭul dang chu MZI Gen. Hqrs. hmingin a hlan nghal a ni.

MZI President chuan MZI, Bawngkawn branch chu duhsakna hlanin, MZI-a member ṭangkai tak tak eng emaw zat awmna Bawngkawn-a MZI branch an hawng ta chu lawmawm a tih thu a sawi. MZI chu zaithiam leh thiam lo te, rimawi tum thiam leh thiam lo te, hla phuah thiam leh thiam lo te pawh zai leh rimawi ngaina te an len vekna pawl a nih thu a sawi.

MZI Patron R Lalzirliana pawhin thu sawiin, "Rimawi leh hla satute tel loin kan awm thei lo a, eng hunah pawh chhiat/ṭhat kan tawh leh kan punkhawmnaah kan zai ṭhin a, rimawi hi Mizote nunah a pawimawh em em a ni" tiin, MZI pawl lian takin Bawngkawn-a branch an hawng ta chu lawmawm a tih thu a tarlang.

R Lalzirliana chuan "Hmanlai Bawngkawn ni lo, Bawngkawn thar ka hmu" tiin, MZI branch hawnna puala concert huaihawtah pawh ruia midang tana hnawksaka awm chi hmuh tur awm lo chu lawmawm a tih thu a sawi. Art & Culture Deptt leh MZI hmalaknain ni thum awh tur Zoawi rimawi kutpui nei tura hmachhawp a awm mek thu sawiin, NEC aṭangin sum mamawhte pawh an hmuh hnai an beisei thu a sawi bawk.