Miss Universe 2022 atan USA mi R’Bonney Gabriel thlan a ni

Khawvel ram 84 zinga piannalh, thluakṭha, hmelṭha bakah mi hman tlak tak tak fuankhawmna Miss Universe 2022 vawi 71-na chu nimin zing khan Ernest N Morial Convention Center, New Orleans, Louisiana-ah a hmawr bawk fel a ni ta a, Miss USA 2022 kum 28 mi, R’Bonney Gabriel chuan Miss Universe 2022 lallukhum hi a khum haw a, kum hmasa lama pakhatna India nula Harnaaz Sandhu-i'n a khumtir.

R'Bonney bihchianna

R’Bonney Gabriel hi Houston, Texas-a khawsa a ni a, a nu hi American niin a pa hi Filipino a ni thung. Filipino American zinga Miss USA ni thei hmasa ber a ni.

R’Bonney hi eco-friendly fashion designer, model leh puanṭhui zirtirtu a ni a, University of Southern California-ah psychology degree neih tumin a bei mek a, University of North Texas aṭangin Bachelor degree a nei a, ama pual clothing line, R’Bonney Nola-ah CEO hna a chelh mek a, ft 5 leh inches 7 a sang a ni.

The winning answer

Miss USA 2022 chuan a zawhna hnuhnung ber a chhan ṭhat em avangin he crown hi a khum haw ti ila kan sawi sual lo ang. United States chuan kum 10 hnuah Miss Universe an nei leh ta a, kum 2012 khan Olivia Culpo chuan he crown hi a lo khum haw tawh a ni

Q. "Miss Universe hi lo ni ta la, eng tin nge he organization hi pawl chak leh hmasawnna kawnga thawhhlawk tak a ni tih i lantir ang?"

Ans : Thil lian tak thlak danglamna kawnga hmahruaitu atan ka hmang ang. Designer tak ka ni a, kum 13 chhung puan ṭhuitu ka nihna angin, inchei dan (fashion) hi thil ṭha tihna atan ka hmang ṭhin a ni.

Ka hnathawhnaah chuan, thawmhnaw kan siam dawn hian hman nawn theih, recycled materials kaltlangin bawlhhlawh tlem thei ang ber hnutchhiah ka tum ṭhin. Human trafficking vanga bum tuar leh, domestic violence lo tuar tawh ṭhin hmeichhiate hnenah puan ṭhui zirtir hna ka thawk bawk.

Hei hi ka sawilanna chhan chu mihringa hlutna kan inhailan sak thiam te, khawtlang tana mi hmantlak nih te leh, kan talent danglam tak te hi danglamna thlentu lian takah kan chantir thei a ni. Keimahniah hian thil danglam bik tak a awm ṭheuh a, midang hnena he chi hi kan tuh chuan an nunah hmasawnna kan hmu a, chu chuan thil ṭha zawk a lo hringchhuak dawn a ni.

India aiawh Davita Rai-i'n top 5 thleng zo lo

India nula kum 25 mi, Davita Rai chu top 16 a inhlangkai a, a ṭha zual panga thlan chhuah zingah erawh alang phak ta lo a ni.

Davita Rai hi Mangaluru, Karnataka-a piang leh seilian a ni a, Mumbai-a Sir JJ College of Architecture graduate a ni.

Nikum khan India nula chhuanvawr, actor-model Harnaaz Sandhu chuan kum 21 hnuah Miss Universe crown hi India ramah a lo hawn a; Harnaaz hma hian, Sushmita Sen (1994) leh Lara Dutta (2000) te'n he crown hlu tak hi an lo hawn tawh bawk.