Khiangte Construction Ṭhazual Lengzem; Siampuii x Casper "Suangtuahna" chungah an léng

Khiangte Construction Ṭhazual Lengzem chart-ah Sihphir nula zaithiam, Siampuii Ralte leh artist hmabak nei eng Casper te thawhdunna hla, "Suangtuahna" leng vel chuan chart chung berah a rawn hruai thleng ta!

He hla hi a hla satu vék, Casper-a phuah a ni a, a hla thu a tunlaiin music nen inchawih rem taka siamtu hi Tluanga Hnamte (West End Studio) a ni. Video hmuhnawn taka rawn lan chhuah tirtu hi zuala.langel a ni. Hun rei tak chart-a a cham hnuah pakhatna a ni thei hi an phu hle.

'Thawnthu a tawp' leh 'Han ni la'
Lengzem artist ṭha pahnih, Jt Production leh Rachel Lalnunkimi hla "Thawnthu a tawp" chuan kumtharah a chetṭhat rawn chhunzawmin pahnihnaah a rawn invawrh a.

Zonet leh The Fame Entertainment ṭangkawpin an buatsaih, Mizo Girl Group Survival Show hmasa bera pakhatna, Ivyz hla "Han ni la" chu top 3-ah a rawn inhlangkai a, a music video a hmuhnawmin an chevel pawh a hmuhnawn hle a, chart lamah hma an sawn zel pawh a beiseiawm hle.

Remruatfeli, David Darlong leh chart a lang dangte
Remruatfeli hla hit, "A chiai min ti ang" chu palinaah a awm a, Mizo Idol hnuhnung bera pathumna David Darlong single "Lenghermawi" pawhin hmasawn lam a pan zel. Tetea Renthlei, Mary Dawngi, Manuna, Eddie Pachuau leh Biakzama-te chu chart-a hming lang dangte an ni.