Miss Universe pageant-ah Miss Thailand inchei danin sawi zui a hlawh

Miss Universe 2022 neih zawh taka Thailand aiawh, Miss Thailand Anna Sueangam-iam-i'n evening-gown round-a soda tab remkhawm hmanga siam kawr a rawn hak chuan mipui lawm a hlawhin, sawi zui pawh a hlawh phah hle.

Miss Thailand dress hi a viral nasa tawh hle a, Sueangam-iam hian Instagram lama a inthuamna tarlan chuan like nuai 2 dawn a nei tawh. He dress hi Manirat brand chuan an design a, "Hidden Precious Diamond Dress" tih hming an puttir a, soda can leh Swarovski crystals belhkhawm hmanga ṭhui a ni.

Heng soda tab-te hi mawlmang taka design an ni lo a, Sueangam-iam-i lo ṭhanlenna kawng thui tak lantirtu an ni. "He gown hi ka naupan laia ka chhehvela thil thleng aṭanga rawn piangchhuak a ni," tiin, "Ka nu leh pate hi bawlhhlawh khawnkhawmtu an ni a, ka naupan lai nun chu bawlhhlawh leh hnawmhne vela kual a ni. He gown dangdai tak hi recycled materials hmanga ṭhui khawm an ni a, mi ngaiha mihring hmantlak lohte hian hlutna leh mawina bik riau an nei ṭhin avangin 'Can Tab' tih hming puttir a ni. In hmuh a, in ngaihthlak leh mihring zahawmna zahsaktu in nih ṭheuh avangin ka lawm e," tia a gown chungchang a sawifiah chuan mi ngaihven a hlawh a, midangin bawlhhlawh paih nula hmelṭha 'the garbage beauty queen' tihte'n ko ṭhin mah se, chu chuan mihring danglam bik nih tuma a beihna chu a dal zo chuang lo a, chu chuan rah ṭha rawn chhuah zelin khawvel ngaihsan rawn a ni ta a ni.

A official bio aṭanga a lan danin, Sueangam-iam hi kum 24 mi a ni a, Bangkok khawpui ṭawp lai, slum area-a a piang leh seilian a ni. A chhungte'n an khawpuia suahsualna lak ata a fihlim theihnan temple-ah dahin , Buddhist nun kiangah a seilian a, monk ho chaw eibang ringin a khawsa ve naw naw ṭhin a ni.

Miss Universe crown khum haw thei chiah lo mah se, Sueangam-iam chuan he platform hi naupang khawsak harsa tak takte khaichhuahna leh ṭanpuina atan hman chhunzawm zel a tum thu a sawi.