Zoram Thar Zofate Lairelna Inpui hruaitute'n kum puanna hun hmang

Zoram Thar Zofate Lairelna Inpui hruaitute chuan nimin khan Aizawl Press Club-ah Press Conference kovin, kum puan hun an hmang. Zoram Thar Zofate Lairelna Inpui hruaitu, Dr. Zaichhawna Hlawndo chuan kum 2023 hi Zofate Pathian Lal Ram tana Intihthianghlim kum ah a puang.

He kum puan bawhzuina atan hian 'Chawnghei Ṭawngtai Rammut' chu January 23-25 hian PB Vanlalauva Memorial Camping Centre-ah neih a ni dawn. He Chawnghei Ṭawngtai hi lânga chhim duhte tan pawh a chhim theih ang.

January 26, Republic Day zan dar 7-ah Ignite Studio ah kum 2023-a Mizoram Inthlanpuia Lalpa Lal Ram Sawrkar tana chhiahhlawh intelkhawm, Lalpa thuthlung bawm zawntute hming puanna hun hman a ni dawn. He programme hi LPS 10 leh Zoram Thar YouTube channel-ah live a pek chhuah a ni ang.