Avatar leh M3GAN bawk an langsar

  US Box office-ah "Avatar: The Way of Water" leh "M3GAN" tukdawl thei an la awm lo a, sum lakluh lamah pawh an chungnung fal hle.

Hun rei tak ata kan lo nghah tawh, Avatar chhunzawmna chu beisei ang ngeiin a hlawhtling chho zel a, tlangzarh a nih aṭanga kar nga hnuah USD mtd 31.1 chuang hailut lehin, kar hmasa nen tehkhinin a sum lakluh hi 36% in tlahniam bawk mah se, a rorelna paihthla thei khawpa ennawm chhawpchhuak thei an la awm lo a ni.

James Cameron kutchhuak Avatar 2 hian US bikah USD mtd 570.3 lalutin, ram pawn aṭangin USD tld 1.3 a lalut tawh. Khawvel huap theatre aṭangin USD tld 1.9 chuang hailut tawhin, film hmuhnawn leh danglam bik hian USD 2 huang a hnaih tawh hle.

M3GAN thawm a la ring
US tualchhung box office-ah M3GAN chuan a chet ṭhat a la chhunzawm zel a, USD mtd 17.9 chuang a hailut leh. Mihring ang taka siam, artificial intelligence naute lem sual tak hmuhnawm titu an la tam a, film senso hautak lo tak ni mah se, a film kalhmang a danglam em avangin box office-ah hun rei tak cham thei khawpa film 'quality' a ni.

Film langsar te
Tom Hanks channa, comedy-drama film "A Man Called Otto" pawhin thawm a rawn nei ring viau a, theatre 3,000 chuang aṭangin USD 12.6 a lalut. "Puss in Boots: The Last Wish" chu top 10 huangah kar li chhung a chamna a ni a, he film hian USD mtd 106.3 zet a lalut tawh a ni.