Critics Choice Awards-ah India film RRR a che ṭha

Critics Choice Award vawi 28-na chu Fairmont Century Plaza Hotel, Los Angeles-ah Thawhṭanni khan semchhuah a ni.

Broadcast, radio, online critics leh entertainment journalists mi 500 rual intelkhawmna, The Critics Choice Association chuan film leh television lama che ṭhate hnenah chawimawina an hlan ṭhin a ni.

Kumin hian film lamah “Everything Everywhere All at Once” chu langsar berin nomination 24 a hmu a, television lamah “Abbott Elementary” chuan nomination paruk a hmu thung.

RRR-in a huang chin zauh zel
SS Rajamouli kutchhuak 'RRR' chuan khawvel huapah Indian film industry-in hma a sawnzia a rawn tarlang nawn leh a, RRR hian 'Naatu Naatu' hla vangin Best Song award bakah, Best Foreign Language film-a hum haw bawk.

RRR hi Best Director, Best Picture leh Best Visual Effects-ahte nomination a hmu a, hmanni lawka semchhuah tak Golden Globes-ah khan 'Naatu Naatu' vang bawkin Best Song-ah thlan a lo ni tawh a ni.