Lisa Marie fate'n Elvis-a Graceland estate an rochun dawn

"King of Rock and Roll" Elvis Presley fa neih chhun, kar hmasa lawka kum 54 mi nia fam ta, Lisa Marie Presley fate chuan Elvis-a'n a damlaia a nu leh pate nena an khawsak hona ṭhin, Graceland estate chu an rochun dawn.

He estate sulhnu ngah leh ropui tak hi kum 1977-a Elvis a thih khan, a fanu kutah dahin, Lisa hian a enkawl zui a ni.

He estate hi an chhungkaw tan a hlu hle a, Elvis-a'n a naupan lai hun zawng zawng a hmanna a nih piah lamah, a pa a sunna hmun a ni tel. A pa boral hnuah kum 25 mi zaithiam ropui chuan a rochun zui ta a ni.

Lisa hi a pain a boral san khan USD maktaduai 100 a rochun tel a, mahse sumdawnna kawngah duhthlanna fel tawk loh avangin a sum hnutchhiahte hi a ti riral hneh viau niin an sawi. Elvis chuan kum 1957 khan Graceland estate hi USD nuai 1-in a lei a, man neia hawh leh zan riah theihna hmunah siam danglam niin, rampawn thlengin tlawhtu an ṭhahnem ṭhin hle.

Elvis-a estate hlutzawng hi tunah chuan USD mtd 500 hu vel niin an chhut a, Lisa fate pathum phir Harper leh Finely Lockwood (14) leh Riley Keough (33) te enkawlna hnuaiah a awm tawh ang. An chhungkaw inphumna estate hma hun hi engtin nge a kal zel dawn hriat la ni lo mah se, Presley chuan kum 2013-a Entertainment Tonight-in an kawmnaah an estate chu an chhungkaw peng pakhat a nih reng tawh tur thu leh, a boral hnuah pawh a fate kutah a hlan chhunzawm mai tur thu a lo sawi lang tawh a ni.