Michael Jackson hringnun tarlanna film siam tumin hmalakna kalpui mek

Khawvel zaithiam ropui bera mi tam takin an chhal, "King of Pop" tih hming lem an pek hial Michael Jackson-a'n a hringnun a hmanchhoh dan chanchin 'biopic' siam tumin film production company lian, Lionsgate chuan hmalakna an kalpui mek tih a puang.

A film hmingah "Michael"

He film hmingah hian "Michael" tih a ni dawn a, kum zabi 20-naa musician ropui ber zinga mi hringnun leh rimawi lama hun a hman dan chanchinte ngaihnawm thei ang bera tarlan a ni dawn a, a chanchin ṭha lai aṭanga an puh hmingchhiatna lam hawi kan hmu dawn em tih chu mi tam tak zawhna a ni ṭan tawh a ni. "Bohemian Rhapsody" film aṭanga kan hmelhriat, producer Graham King kutchhuak kan hmu leh dawn a, a hmuhnawm leh viau pawh a rinawm.

Zaithiam danglam bik

King of Pop hi zaithiam zinga chawimawina dawng hnem ber a ni a, rimawi huang bikah chuan hlawhtlinna vawrtawp a chang ti ila kan sawisual lo ang. Pop culture thlakdanglamtu niin 'moonwalk' leh 'robot' dance tilartu a ni.

Kum 1964 khan a pianpui unau Jackie, Tito, Jermaine leh Marlon-te nen Jackson 5 an din a, Motown Records hnuaiah kum 1971 aṭangin mimal angin a kal leh. Kum 1979 khan "Beat It" album tichhuakin, khawvel hmelhriat a ni ṭan. Music channel hlun, MTV tilartu a ni a, hemi hnuah album hlawhtling tak tak Thriller(1982), Bad (1987), Dangerous (1991), HIStory: Past, Present and Future, Book I (1995) leh Invincible (2001)-te a tichhuak tawh bawk.

Sulhnu ropui

MJ hi Billboard Hot 100 songs chart-ah a hla 13 chu No.1 a nihpui thei a, a hlawhtlinna kailawn bul ṭanna tiha sawi theih an unaua band anga an zaina Jackson 5 hla zinga pali chu Hot 100-ah No.1 an ni thei bawk a ni.

Jackson-an kum 1982-a album a tihchhuah ,Thriller" phei kha chu album tlangzarh tawh azawnga hlawhtling ber leh hralh tla ber a ni a, Billoboard 200-ah kar 37 chhung zet a cham a, he album-a a hla pasarihte'n Hot 100 top 10 an thleng vek a ni.

Jackson hi June 25, 2009 khan kum 50 mi niin cardiac arrest vangin a thi a ni.