Lukas Graham album thar 4 (The Pink Album)

Danish pop band, Lukas Graham lead vocalist Lukas Forchhamer chuan a hringnuna thawnthute chu rimawi hmanga tichhuak lehin, nimin khan an band hian album thar 4(The Pink Album) chu an tlangzarh.

Kum 2018 hnua an album hmasa ber a ni a, '4'-ah hian hla 11 awmin, kum liam ta chhunga Forchhamer-a'n a zinkawng a hmachhawn dante, kum 2012-a rin lawk loh taka a pain a boralsan tak dan te leh fa duhawm tak pahnih pa a nih dan chanchin tarlan a ni.

"Amateur hlim tak nih ka duh"

4(The Pink Album) chungchang sawiin, Forchhamer chuan album chu ama ngaihtuahna aṭanga rawn piang chhuak liau liau a nih thu sawiin, "Ruihtheihthil laka ka fihlim hnuah mahni inenlet a awlsam sawt avangin ka nghei theih phah a ni. Kum liam ta chhung khan, hla phuah hi nuam ka ti thar hle a, rehearsal-a kalte leh music hmanga hnathawh phurna ka nei let a ni. Professional nih ka tum tawh lo, amateur hlim thei tak nih ka duh zawk," a ti.

1,2,3,4.....

4(The Pink Album) hi Lukas Graham studio album palina a ni. An project hmasa 3(The Purple Album)-a an hla "Love Someone" kha Billboard Adult Top 40 leh Adult Contemporary chart-ah top 10 a thleng ve ve a ni.

Lukas Graham hian kum 2015 khan an hla "7 Years" hmangin rimawi khawvel an deng chhuak a, Billboard Hot 100-ah pahnihna a rawn nih phak bakah, Grammy nomination pahnih a hmuh phah bawk a ni. "7 Years" awmna, Blue album pawh kha a hlawhtling hle a, Billboard 200-ah pathumna niin Danish act zingah anni aia thleng sang an la awm lo a ni.