'The New Mutants' August-ah tlangzarh tum

X-Men spin-off 'The New Mutants' chu hun eng emaw chen tihkhawtlai a nih hnuah August 28-ah tlangzarh a ni dawn.

'The New Mutants' hi cinema-ah tihchhuah an tum a, hripui leng vangin film eng emaw zat chu cinema-ah tihchhuah tum ni lo mah se X-Men spin-off hi chu tihchhuah an tum thung a ni.

Marvel Comics behchhana siam film-ah hian a changtute pawh an ṭha dawn hle a, Game of Thrones star Masie Williams chu Sophie Turner hmungzuiin X-Men khawvelah a zuang lut a, Anya Taylor-Joy, Charlie Heaton leh Alice Braga-te pawh kan hmu dawn.

The Fault in Our Stars director Josh Boone bawk khan a direct avangin a hmuhnawm ngei ang tih a rin theih a, X-Men producer Simon Kinberg bakah Karen Rosenfelt leh Lauren Shuler Donner-te chu producer an ni a, a project hi a lian hle tih a hriat.

Ruahmanna hmasaah kha chuan April thlaa tlangzarh hman an tum a, mahse hripui lengin entertainment khawvel nasa takin a nghawng a, chu chuan nghawng telin August-a tlangzarh hi an tum ta zawk a ni.

'The New Mutants'-ah hian mutant panga, an duh vang reng ni loa khung hrante chuan tlanchhuah an tum dawn a ni. Marvel Comics chhiar ṭhinte tan chuan a nghahhlehawm hle dawn tih a chiang a, Maisie Williams hi Wolfsbane lemah a chang ang a, Anya Taylor-Joy hi Magik lemah a chang thung ang.