Khawthlang ramah RRR a tla na

India ram theatre-ah tlangzarh a nih aṭanga thla 10 a liam hnuah pawh action-fantasy film, RRR chu titi tui ber a la ni mek. Khawthlang ram lamah film lam chawimawina ngaihhlut tak tak sem chhoh zel an ni a, chawimawina ṭhahnem tak hum haw tawhin, rinlawk aiin khawthlang ramah a che ṭha hle.

Film director SS Rajamouli chuan RRR chu India mipuite tan bik liau liaua siam a nih thu a lo sawi tawh. Ram Charan leh Jr NTR te channa, RRR hi British awpna hnuaia India tana zalenna sualtute chanchin behchhana siam a ni.

Sum leh chawimawinain a um

Khawvel huapah Rs tluklehdingawn 12(USD mtd 146.5) chuang a hailut tawh. Netflix US-a film enhlawh zual 10 zingah hun rei tak chhung a cham tawh bakah, Japan box office-ah record thar a siam bawk a ni. Kum liam taa tlangzarh film ṭha zual thlanchhuahah a hming a lang chho mawlh mawlh a, British Film Institute leh US-a National Board of Review-te pawhin an dah chungnung hle.

"Naatu Naatu"

Kar hmasa lawk khan, RRR film-a an hla, zawmpui awlsam leh thothang ṭha tak "Naatu Naatu" chuan Golden Globe award-ah best original song a lo dawng tawh a, Critics' Choice Awards-ah RRR film leh a hla vek hian award pakhat ve ve a dawng lehbawk a ni.

Mithiamte'n an fak

"Film tlangzarh kara entute kha India mi deuh vek an ni. Mahse hun a kal zel a, tunah chuan entute pawh an inchawlhpawlh tawh hle," tiin New York-based critic, Siddhant Adlakha chuan Indian film vantlang tak tura a ngaih thu sawi mah se, film danglam leh hmuhnawm chu thup bo reng theih a nih loh zia rawn tarlang. A-list Hollywood director - Joe Russo, Edgar Wright, Scott Derrickson leh James Gunnye-te pawhin an fak hle.

Oscar-a tel tura duhtu an pung zel

RRR hian India aṭanga Oscars official entry erawh a hmu phak lo a, Gujarati language movie "Chello Show" a hneh zo lo. Mahse RRR telh zawk tur hian director leh milar tam takin ngenna an thlen tawh a ni.

Variety predict danin, Telugu-language film hi Best Film, Best Director, Best Cinematography leh Best Original Song-a nomination hmu thei tur leh, award pakhat tal dawng thei turin dinhmun ṭha takah a din thu a tarlang.